Na Tujh Se Hai Gila

Na Tujh Se Hai Gila Na Aasmaan Se Ho Ga,

Teri Judaai Ka Jhagra Jahan Se Ho Ga,

 

Tumhare Mere Tall'uq Ka Log Poochte Hain,

K Jaise Faisla Mere Bayan Se Ho Ga,

 

Agar Yoonhi Mujhe Rakha Gya Akele Mein,

Baraamad Aur Koi Is Makaan Se Ho Ga,

 

Judaai Tey Thi Magar Yeh Kabhi Na Socha Tha,

K Tu Juda Bhi Judagana Shaan Se Ho Ga,

 

Guzar Rahe Hain Mere Din Isi Tafakhur Mein,

K Agla Qais Mere Khandaan Se Ho Ga...

Jab Apni Apni Mehroomi Se

Jab Apni Apni Mehroomi Se Dar Jate Thy Hum Dono,

Kisi Gehri Udasi Mein Utar Jate Thy Hum Dono,

 

Bahar E Shoq Mein Baad E Khizaan Aasaar Chalti Hai,

Shugaft E Gull K Mosam Mein Bikhar Jate Thy Hum Dono,

 

Tumhare Shehar K Charon Taraf Paani Hi Paani Tha,

Wohi Ik Jheel Hoti Thi Jidhar Jate Thy Hum Dono,

 

Sunehri Machliyan, Mehtaab Aur Kashti K Andar Hum,

Yeh Manzar Gum Tha Phir Bhi Jheel Par Jate Thy Hum Dono,

 

Zamastaan Ki Hawaon Mein Faqat Jismo K Kheme Thy,

Dabak Jate Thy Un Mein Jab Thethar Jate Thy Hum Dono,

 

Ajab Ik Be Yaqeeni Mein Guzarti Thi Kinare Par,

Theharte Thy Na Uth K Apne Ghar Jate Thy Hum Dono,

 

Bohat Sa Waqt Lag Jata Tha Khud Ko Jama Karne Mein,

Zara Si Baat Pe Kitna Bikhar Jate Thy Hum Dono,

 

Kahin Jana Nahi Tha Is Liye Ahista Ro Thy Hum,

Zara Sa Faasla Kar K Thehar Jate Thy Hum Dono,

 

Zamana Dekhta Rehta Tha Hum Ko Chor Ankhon Se,

Na Jane Kin Khayalon Mein Guzar Jate Thy Hum Dono,

 

Bas Itna Yaad Hai Pehli Muhabbat Ka Safar Tha Woh,

Bas Itna Yaad Hai Shaam O Sehar Jate Thy Hum Dono,

 

Hadood E Khuwab Se Aagy Hamara Kon Rehta Tha,

Hadood E Khuwab Se Aagy Kidhar Jate Thy Hum Dono...

 

 

Dasht Mein Pyas Bhujate Hue

Dasht Mein Pyas Bhujate Hue Mar Jate Hain,

Hum Parinde Kahin Jaate Hue Mar Jate Hain,

 

Hum Hain Sookhe Talab Pe Bethe Hue Hans,

Jo Tall'uq Ko Nibhate Hue Mar Jate Hain,

 

Ghar Pahunchta Hai Koi Aur Hamare Jaisa,

Hum Tere Shehar Se Jate Hue Mar Jate Hain,

 

Kis Tarah Log Uth Kar Chale Jate Hain Chup Chaap,

Hum To Yeh Dheyan Mein Laate Hue Mar Jate Hain,

 

Un K Bhi Qatal Ka Ilzaam Hamare Sar Hai,

Jo Humein Zehar Pilate Hue Mar Jate Hain,

 

Yeh Muhabbat Ki Kahani Nahi Marti Lekin,

Log Kirdar Nibhate Hue Mar Jate Hain,

 

Hum Woh Tooti Hui Kashtiyon Wale Taabish,

Jo Kinaron Ko Milate Hue Mar Jate Hain...

Aye Dost Dua Aur Musafat Ko

Aye Dost Dua Aur Musafat Ko Beham Rakh,

Yeh Meri Hatheli Hai Yahan Pehla Qadam Rakh,

 

Aise To Zamana Mujhe Jeene Nahi De Ga,

Main Kuch Bhi Nahi Tera Magar Mera Bharam Rakh,

 

Iss Baat Pe Duniya Se Meri Banti Nahi Hai,

Kehti Hai K Talwar Utha Aur Qalam Rakh,

 

Main Jab Bhi Kahin Raah Mein Girne Laga Taabish,

Aawaz Si Aayi Mere Qadmon Pe Qadam Rakh...

Badbaan Kab Kholta Hoon

Badbaan Kab Kholta Hoon Paar Kab Jata Hoon Main,

Roz Raste Ki Tarah Darya Se Laut Aata Hoon Main,

 

Subah Dam Mein Kholta Hoon Rassi Apne Paon Ki,

Din Dhale Khud Ko Kahin Se Haank Kar Lata Hoon Main,

 

Apni Janib Se Bhi Deta Hoon Kachu K Jism Ko,

Us Ki Janib Se Bhi Apne Zakham Sehlata Hoon Main,

 

Ek Bache Ki Tarah Khud Ko Bitha Kar Samne,

Khoob Khud Ko Kosta Hoon Samjhata Hoon Main,

 

Khushak Patton Ki Tarah Hai Quwwat E Goyai Bhi,

Baat Koi Bhi Nahi Aur Bolta Jaata Hoon Main,

 

Yeh Wohi Tanhai Hai Jis Se Behal Jata Tha Dil,

Yeh Wohi Tanhai Hai Ab Jis Se Ghabrata Hoon Main,

 

Ishq Mein Maaney Hai Ghalib Ki Tarafdari Mujhe,

Roub Jab Chalta Nahi To Paaon Par Jata Hoon Main,

 

Mere Hath Aate Hain Tabish Dosre Mosam K Phool,

Ek Mosam Mein To Tehni Tak Pahunch Pata Hoon Main...